Tag Archives: අරුම පුදුම දුරකතනය

ඒ අරුම පුදුම දුරකතනය ….


මගේ ගාව තිබිච්ච හරිම අපූරු දුරකතනයක් ගැන තමයි මේ කතාව… මේක වෙලා දැන් ටිකක් කල්… දුරකතනයක් කිව්වට ඒක මොබයිල් එකක්… ඒ දවස් වල මොබයිල් එකක් කියන්නේ ඉතින් ලොකු දෙයක්… මේ කියන දුරකතනයත් ඒ දවස් වල මාර ගනන්… මේක ගත්තෙ ඉතින් සලිලි තියෙනවාට එහෙම නෙවෙයි… ලංකාවෙන් පිට විස්ව විද්යාලෙක ඉගෙනගත්තු මට ගෙදරට කතා කරන්න ඕන නිසා…

ඒ දවස් වල ඉතින් මේ මොබයිල් එක මට ලොකු දෙයක්…. ඔන්න ඉතින් මම මේ හා හා පුරා කියල ගත්තු මොබයිල් එකත් අරන් ගොඩවුනා විස්ව විද්යාලෙ පොදු වැසිකිලියකට… ඔය ගොල්ලො හිතනවා වගේ වෙන මගුලකට නෙවේයි ඒකත් අරං වැසිකිලියකට ගියෙ… ඒක අරං යන්නේ තටම තටම ඉන්න ගමන් ගේම් ගහන්න… ඉස්සර වොටර් ගේම්, විඩියො ගේම ගහපු අපිට මොබයිල් එකේ තිබ්බ “නයා” ගේම් එකත් රත්තරං වටිනවා…

අනේ දෙය්යනේ කියල ගොඩවෙලා, ස්කොටින් පෑඩ් එකේ වාඩිවුනා විතරයි…

සාක්කුවේ තිබ්බ මගේ රත්තරං මොබයිල් එක වැටුනා නේද කොමඩ් එකට !!!

මළ කෙළියයි.. දැං මොකද කරන්නේ??

ගන්න විදියකුත් නෑ…

අච්චර සල්ලි දීල අරගෙන නැතිකරගන්නත් බෑ… මොකද මම දන්නවා ආයේ එකක් ගන්න දෙන්න තරම් සල්ලි අපේ අම්මලා ගාව නැහැ කියලා…. ටිකක් වෙලා කල්පනා කර කර ඉඳලා…. ඕන මගුලක් වෙවා කියල හිතලා ගන්න තීරණය කළා…

ඒත් ඉතිං කොහොමද?… පොදු වැසිකිලියක් කියල බැලුවෙ නැහැ… ඇස් දෙක පියාගෙන අත දාලා ගත්ත ඉතිං…

දැං ඔයලාට ඉතිං හිතෙන්නෙ “ඊයා..” චිකේ..” “කක්කි..” “මල ජරාව…” කියලනේ… ඒත් ඉතිං මක් කොරන්නද… ගන්න උනා එහෙම…

ඉතින් ඔන්න මේ මොබයිල් එක වලෙන් ගොඩ ගත්තු ගමන් උත්සව ශ්‍රීයෙන් අරන් කක්කි කියල බලන්නෙ නැතුව බැටරිය ගැලෙව්වා… ඒක කෑලි කෑලි වලට නිරුවස්තර කරලා ගිහින් දැම්මා සින්ක් එකට… හොදට වතුරෙන් හෝදලා, ඩිටෝල් කුප්පියකුත් හැලුවා ඒකටම….ඔහොම හොඳට හෝදලා අරගෙන… වැලේ වැනුවා වේලෙන්න…

මම හොදටම දන්නවා ඒ හෝදපු විදියට දැන්නම් ඉතින් මේකට සොරි තමයි කියලා..

කොහොම හරි පහුවෙනිදා උදේ නිකමට වගේ වේලුනාට පස්සෙ අටවලා බැලුවා… මාව පස්වනක් ප්‍රීතියෙන් පිනාගියේ මේක කිරි ටොයියා වගේ වැඩකරන හැටි දැක්කම!!

මේ කතාව මට කියන්න මතක් උනේ අද නාන්න ගිය වෙලාවේ අලුත්ම අලුත් සබං කෑල්ලක් මගේ අතින් කොමඩ් එකට වැටුන නිසා… මොනව කරන්නද… ලස්සනට ෆ්ලෂ් කරලා යැව්වා…

ඒ අරුම පුදුම දුරකතනය මොකද්ද කියල දැන් කුතුහලය ඇති නේද? අච්චර බොග වලකට වැටිලත්, ෆුල් ලොන්ඩරි පාරක් දීලත් මුකුත් නොවුනා වගේ වැඩකරපු මොබයිල් එක මොකද්ද කියල කියන්නම්….

ගඩොල් බෑ දුරකතන යුගයට ගුඩ් බායි කියල හා හා පුරාම ආපු නොකියා 3310 ඔයාලට මතකයි නේ? මතක නැත්නම් මෙතන කොටල පින්තූරයක් බලා ගන්න…

හරී…. කතාව ඉවරයි…. අසා සිටි ඔබ සැමට ස්තූතියි… මේ වගේ සිද්දි වෙලා තියෙනවා නම් හරි වෙලා නැත්නම් හරි පහල කොටුවෙ කොමෙන්ට් එකක් දාලා යන්න…

Advertisements