Tag Archives: ඒකොන්

ඒකොන් හීනෙන්වත් නොදුටු ලක් පුර…


දවස් ගණනක් තිස්සේ අලුත් සින්දුවක රෙකෝඩින් කර කර හිටපු ඒකොන් ගෙදර අවෙ හොදට නිදාගන්න බලාගෙනය. පොඩි වොෂ් එකක් දාගත්තු ගමන් ඇඳට වැටුන ඒකොන්ට යස අපූරුවට නින්ද ගියා…

x x x

ගුවන් පථයට ගොඩබෑ යානය හෙමින් හෙමින් ගුවන් තොටුපල වෙත ඇදෙමින් තිබුනා… ලොකු නින්දකින් ඇහැරිලා කවුළුවෙන් වට පිට බැලූ ඒකොන් දැක්කේ හැම තැනම පොල් ගස් ගොඩක්…

හොදතම තක්බීර්වු ඒකොන් එහා පැත්තෙ බිස්නස් ක්ලාස් සීට් එකෙ හිටපු පොරගෙන් යමක් අහන්න හැරී බැලුවා… සීට් ඔක්කොම වගේ හිස් වෙලා තිබුනත්, එහා කෙළවරෙ සුදු පාට සරමක් සහ බැනියමක් ඇඳ ගත්තු බඩ තඩි, කොට පොරක් ඉන්නවා දැක්ක ඒකොන් පොරගෙන් කලබලයෙන් දන්න ඉංගිරිසියෙන් ඇහුවා “කැන් යා ටෙල් මී වෙයස් දිස් ප්ලේස්” කියලා… ඒකොන් කැඩිච්ච ඉංගිරිසියෙන් අහපු එක තෙරුනේ නැති නිසා එකපාරටම කලබල උන සරම් කාරය ඒකොන්ට රවලා අහක බලා ගත්තා.

උත්සාහය අතෑරියෙ නැති ඒකොන් කවුලුවෙන් එලිය බැලුව…..

එතකොට දැක්ක එලියෙ තියෙන ගොඩනැගිල්ලක “BAND@##$!@&#KE INTERNATIONAL AIRPORT” කියලා. ගුවන්තොටුපලේ නම හදිස්සියකට කියවගන්න බැරි තරම් දිග එකක්වුනත් ඒකොන්ට ලොකු චූන් එකක් ගියා තමන් මේ ගොඩබැහැලා ඉන්නේ “ට්‍රිනිඩෑඩ්” වලට නෙවෙයි කියල තේරුන නිසා…

යානයෙන් පිට වෙලා හොඞවැල දිගේ ගුවන්තොතුපල ඇතුලට ආපු ඒකොන්ව පිළිගන්න සංවිධායකවරු රොත්තක් එක්ක “හිස” මාධ්‍ය කණ්ඩායමත් ඇවිත් හිටියා… පොඩි දුරක් “හිසේ” කට්ටියත් එක්ක කතා කර කර ඇවිදගෙන යද්දි ඒකොන්ට පුරුදු සද්දයක් ඇහෙන්න ගත්තා…. බැලින්නං FM චැනල් එකක යන උගේම සිංදුවක්..

” නෝ බොඩි වොන සී අස් ටුගගේද’… බට්’ඉට් ඩෝන්’ මැට’ නෝ …කොස්’ අයි ගොට් යූ බේබි…”

සින්දුවේ තාලෙට මුමුණන ගමන් ඒකොන් “හිසේ” එකෙක් ගෙ කරට අත දා ගත්තා….

වැඩිදුරක් යන්න හම්බුනේ නැහැ වෙනින් යානයක යන්න ටර්මිනල් එකක හිටපු ‍අලුත් Y – පරම්මරාවේ කොල්ලො ටිකක් ඇවිත් ඒකොන්ව වටකරගත්තා…. හැට්ටයක් වගේ ඉන ගාවට ඔන්න මෙන්න කියල තියෙන ටී-ෂර්ට් එකක් එක්ක, යට ඇඳුමයි තට්ටම් වල බාගයකුයි එලියට පෙනෙන විදියට එක එක වැඩ දාපු ඩෙනිමක් යන්තමින් වැටෙන්නේ නැතුව අටවගත්ත කොලු රැල, ඒකොන් ගෙන් ඔටෝ ග්‍රාප් ඉල්ලන්න ගත්තා… එකක් දෙකක් ලියලා දීල ඒකොන් එතනින ඉක්මනට මාරුවුනේ ට්‍රිනිඩෑඩ් වල ෂෝ එකේදි උනාට වඩා අසික්කිත වැඩක් එතන වෙයි කියලා බය හිතුන නිසා.. මොකද එහෙම උනොත් එකට සමාව ඉල්ලල සින්දුවක් කියන්නත් වෙනවා නේ…

ඔහොම වැඩි දුරක් යන්නවුනේ නැහැ… ආගමන විගමන එකේ නිලධාරීන් ටිකක් ඇවිත් ඒකොන් ව පැත්තකට එක්කන් ගියා.. කට්ටිය දෙපැත්තට වෙලා කුටු කුටු ගාන අතරේ ගුවන් තොටුපලේ තියෙන ටීවී එකක බ්‍රේකින් නිවුස් එකක් එක්ක කියන්න ගත්තෙ ” ඒකොන් ගේ වීසා අවලංගු වෙලා” කියලා.

ටික වෙලාවකට පස්සේ අත් දෙක පිටිපස්සට කරලා මාංචු දෙකක් දාලා දැල් ගහපු බන්ධනාගාර බස් එකකට ඒකොන්ව එක්කන් ගියා… “හිසේ” කට්ටිය නම් මේක දැකල බොහොම කම්පාවුනේ ඒකොන් ගැන හිතල නෙවෙයි… දැන් ඉතින් ෂෝ එකට ටිකට් ගත්තු උන්ටික ඇවිත් ඉතුරු වෙලා තියෙන වීදුරු ටිකටත් ගල් ගහයි කියල බය හිතුන නිසා….

ඒකොන් ට නම් මේක එච්චර ගානක්වුනේ නැහැ.. පුරුදුනැති දෙයක් යැයි කියල ඒකොන් ආතල් එකේ සින්දුවක් කියන්න ගත්තා…

” දේ වෝන්ට් ලෙට් මී අවුට් නෝ.. දේ වෝන්ට් ලෙට් මී අවුට්… ”

බස් එකේ දැල් වලින් එළිය බලාගෙන දුකසේ සින්දුව කියාගෙන ආපු ඒකොන්ට තේරුනා බස් එක නැවතුන බව….

ජේලර් කෙනෙක් ගෙන් මොකද කියල ඇහුවම පොරත් දන්න සිංහලෙන් කිව්වා …

“පොලීසියෙන් මැතිවරණ පෝස්ටර් ගලවනවා ඒක නිසා පොඩ්ඩක් වාහන ටික නවත්තගෙන ඉන්නවා” කියලා…

වාහනත් නවත්තගෙන පෝස්ටර් ගලවන්නේ, මුන් ගාවනම් මේකට කියාපු මැෂින් එකක් ඇති කියල ඒකොනුත් දැල් අස්සෙන් පාරෙ ඉස්සරහා බැලුවා…

පාර අයිනේ හොඳින් වැඩුන උස මාර ගහක මුදුනේ කාගෙදෝ හිනාවෙලා ඉන්න පෝස්ටර් එකක් තියෙනවා ඒකොන් දැක්කා.. පුරුදු මූනක් වගේ තේරුන නිසා ඇස් දෙකත් පිහදාලා බැලුවේ ඉස්සර වාහන හොරකම් කරපු කාලේ හිටපු ෆ්‍රෙන්ඩෙක් ද කියල බලන්න… බැලින්නං ෆ්ල්යිට් එකේ හිටපු බඩ තඩි, කොට පොර තමයි මාර ගහ මුදුනේ හිනාවෙලා ඉන්නේ….

පොලිසියට මාර ගහ මුදුනට යන්න බැරි නිසා බිම ඉඳලා කළු තෙල් ගහනවා පෝස්ටරේ වැහෙන්න… කළු තෙල් වැටෙන නිසා වාහන යන්නේ නැහැ…

කොහොම හරි ඒකොන් ව එක්කන් ගිහිල්ලා දැම්මා අගනුවර සුප්‍රසිද්ධ සිරගෙදරකට. ජේලර් කාරයත් මහ උජාරුවෙන් වගේ කිව්වේ මේ හයි-ෆයි හිර ගෙදරට ආපු දෙවැනියා ඒකොන් කියලා… ඒක අහපු ගමන් ඒකොන් දඩබඩ ගාලා ගිහින් බැලුවා හිර ගෙදර උණු වතුර එනවද කියලා…

මළකෙලියයි… උණු වතුර නැහැ…

ඒත් එක්කම ආපු නිලධාරියෙක් ඒකොන්ට චෝදනා පත්‍රයක් දීලා ගියා… ස්ත්‍රී දූෂණය, වාහන කොල්ලකෑම, අනාචාරයේ හැසිරීම, මියුසිකල් වීඩියෝ හැදීම ඇතුලු කාරනා 5කට චෝදනා කරලා…. හෙට විශේෂ සංගීත අධිකරණයක නඩුව අහනවා කියලත් තියෙනවා….

මේක කියවලා ඉතාමත් කම්පාවට පත්වුන ඒකොන්, මහ හයියෙන් අඬන්න පටන්ගත්තා….

ටික වෙලාවක් අඬනකොට අල්ලපු කාමරේ ඉන්න හිර කාරයා මෙහෙම සින්දුවක් කියනවා….

” අයි වොන්’න මේක් අප් රයිට් නව්’ …  නා නා නා… ”

—-
පින්තූරෙ ඉස්සුවේ: http://www.panachereport.com/channels/hip%20hop%20gallery/images/AkonLockedUp.jpg

Advertisements