පොඩි කාලේ ගහපු ක්‍රිකට්

මම පොඩිකාලේ කරපු වැදගත්ම වැඩේ තමයි ක්‍රිකට් ගැහිල්ල. ඒකටම කියල සෙට් වුන සෙට් එකක් හිටියා අපේ පාරේ… මම තමයි ඉතිං ඔය සෙට් එකේ කැඳවුම් කරු.. ( අදටත් ඉතිං ඒ රස්සාවේ වෙනසක් වෙලා නැහැ ) ඉතිං ඒ නිසාම හැම බාල්දියක්ම පෙරලෙන්නේ මගේ ඔලුවටම තමයි…

අහල පහල ගෙදරක මල් පැල ටිකක් ගැලවිලා තිබුනොත්, මල් පෝච්චියක් බිඳිලා තිබුනොත්, බැරි වෙලාවත් වීදුරුවක් එහෙම කැඩිලාතිබුනොත් කෙලින්ම අහු වෙන්නේ සමීර තමයි..

‘ ඔය සමීර ලා බෝල ගහලා නේ ඕක කරලා තියෙන්නේ ‘ කියන එක ඉතින් ඒ දවස් වල මන්තරයක් වගේ ඇහෙන දෙයක්… ඒ විතරක් නම් මදෑ… සමහර වෙලාවට අහල පහල කටිටිය අපේ උසාවියේ නඩුත් ෆයිල් කරනවා… ඒ නඩු ඉතින් විබාගයට ගන්නත් කලිං මං වැරදිකාරයා වෙලා හොඳ හොඳ දඩුවම් ලැබනවා…

ඔය වගේ කේස් වලට වැරදිකාරයා උනාම මුලින්ම දෙන දඩුවම තමයි,

`කෝ කියනවා බලන්ඩ 7 වරක් චක්කරේ? ‘..

මමත් ඉතිං දන්න පොර වගේ පටං ගන්නවා…

හත්වරක් බින්දුව, බින්දුවයි…

හැම චක්කරේකම මම ඔය බින්දුව කියනවා… මොකද එකකින් හරි දන්න ප්‍රමාණය වැඩිවෙනවා නේ.

හත්වරක් එක, හතයි.
හත්වරක් දෙක, දා හතරයි.
හත්වරක් තුන, ම්ම්ම් …විසි එකයි.
හත්වරක් හතර, විසි…විසි ඥ්ඥයි. 
හත්වරක් පහ, තිස් පහයි.
හත්වරක් හය, ???

හත්වරක් හතර මතක නැති නිසා ඒක ටක් ගාල කියල දන්න කියන හත්වරක් පහ ට පනිනවා.. ඒත් වැඩේ මාට්ටු වෙනවා…

කාලා හමාරයි..

6න් උඩ චක්කර කාටද මතක තියෙන්නේ.. මොකද ක්‍රිකට් වල 6න් උඩ පහරවල් නෑනේ… ඉතිං මට ගොඩක් දවස් වලට වෙන්නේ දණ ගහගෙන නඩුකාර උන්නාන්සේ ඉන්නා දිහාවට ඇහෙන්න චක්කරේ කියන එක තමයි..

ඒ දඩුවම් වලින් ඉතිං ලැබිලා තියෙන ප්‍රතිඵල විසාලයි.. ඒවා නොලබුනා නම් අද මෙතන ඉඳං මට මේවා කියන්න වෙන්නෙ නැහැ..

හරි.. පීලි පනින්න ඕන නැහැ…

මම කියාගෙන ආපු විදියට, ඒ දවස් වල ක්‍රිකට් ගැහිල්ල හරි සුන්දරයි..

අපි වැඩි හරියක් කලේ ඒ දවස් වල ටීම් එකේ හිටපු අය අනුකරණය කරපු එක තමයි…

ඒ දවස් වල ඕපන් කරේ හතුරුසිංහයි මහානාමයි.. ඉතිං හතුරුසිංහ වගේ කැප් එක අස්සට සුදු ලේන්සුවක් දාගෙන තමයි පලවෙනියා බැට් කරන්නේ..

ඊළඟට මහානාම වගේ සාක්කුව හද හද, බැට් එකේ මිටෙන් නිකට ට තට්ටුවක් දාලා එකම තමයි අනික් එකා බැට් කරන්නේ… ඊට පස්සේ එන්නේ ගුරා.. මතකනේ ඒ දවස් වල ගුරා ගැහුවේ GM බැට් එකකින්.. අපි කියන්නේ ගුරා මෝඩයා බැට් එක කියලා.. අපේ ලී බැට් වලත් ඉතිං ඔය GM මාක් එහෙම ගහගෙන තිබුනේ.. තව Slazenger කොටි පැටව්, කුකබුරා කොට්ටෝරුවො එහෙමත් ඇඳලා තිබුනා බැට් වල..

ඉතිං GM බැට් එකක් අරං ඇවිත් ඇහිපිල්ලං එහෙම හොඳට ගහලා, බෝලර්ට බෝලේ දාපං කියලා ඔලුවෙන්ම කියල තමයි ගුරා බැට් කරන්නේ…

ඊට පස්සෙ එන්නේ වීරයා… කුකබුරා බැට් එක කරේ තියාගෙන ඇවිල්ලා පාරෙ තියෙන ගල් කෑලි ටිකක් එහෙම එහෙට මෙහෙට කරලා, තැන් කීපයකට බැට් එකෙන් කොටලා පිච් එක ලෙවල් කරලා එහෙම තමයි `අරා’ පටං ගන්නේ… බැට් කරන්නේත් ඉතිං බෝලේ දාන්න ඉස්සෙල්ල දෙතුන් පාරක් එහෙම කොටලා ස්ප්‍රින්ග් එකක් වගේ කකුල් දෙකෙන් බවුන්ස් වෙවී තමයි..

අර්ජුනගේ නම් ඉතිං වැඩි දෙයක් නැහැනේ.. ඊළග කැරැක්ටරේ තමයි හෂාන්.. බෝලේ දාන දුවගෙන එන කොට බැට් එක කොටන ගමන් හෂාන් වගේ පස්ස පොඩ්ඩක් වනන්න අපේ අය අමතක කරේ නැහැ..

ඒ කාලේ ටීම් එක මාර ජොලි.. දැන් ටීම් එක ඊට වඩා දක්ෂ උනාට ඒ කාලේ ටීම් එකේ හිටියෙ පතාක යෝධ චරිත. දැන් නං ඉතින් හැමෝම එක වගේ ගොඩක් දුරට, සනා ගේ ඔය පෑඩ් එකේ ඉඳලා ඔක්කොම චෙක් කරන එක ඇරෙන්න..

කොහොම උනත් ඒ ටීම් එක ගැන මගේ හිතේ නම් තියෙන්නේ නොමැකෙන මතකයක්.. තවමත් ඒ ක්‍රීඩකයන්ට ආදරෙයි.. ඊට වසර කීපයකට පස්සේ ලෝක කුසලානයත් දිනුවා නේ..

ගුවන් අනතුරු වලින් නැතිවන ජීවිත..?

අද දවසේ ප්‍රධානම පුවත උනේ පාකිස්තානයේ අගනුවර ආසන්නයේ සිදුවූ ගුවන් අනතුරයි… තාක්ෂණය මෙතරම් දියුණුව පැවතුනත් දිනෙන් දින නවීනතම පන්නයේ ගුවන් යානා එලිදැක්වූවත්, මේ ගුවන් අනතුරු වළක්වාගන්න තවමත් හැකිවී නැහැ..

පසුගිය දශකය පුරාම වසරකට බරපතල ගුවන් අනතුරු 6 බැගින් සිදුවෙමින්, වසරකට ජීවිත 500-600 ක් පමණ අහිමිවෙමින් පවතිනවා.. මේ අනතුරුවලට ප්‍රධාන හේතුව වන්නේ මිනිස් වැරදියි. ඒ වගේම දුර්වල නඩත්තුකිරීම් සහ විවිධ තාක්ෂණික හේතුනුත් නිසා ගුවන්යානා අනතුරට ලක්වෙනවා…

1998 සිට මේ දක්වා සිදුවූ ප්‍රධාන ගුවන් අනතුරු පිළිබඳ සංක්ෂිප්ත සටහනක් බී.බී.සී අඩවියේ දක්වා තිබුනා..

හැම ගුවන් අනතුරකටම හේතුව පරීක්ෂාකිරීමට සමීක්ෂණයක් සිදුකෙරෙන අතර, ඒ ආකාරයෙන් එම වැරැද්ද යලිත් සිදුනොවීමට වගබලාගැනීමට සැවොම දැනුවත් කෙරෙන අතරම එවන් වැරදි අඩුකරගැනීමට අවශ්‍ය තාක්ෂණික මෙවලම් ද නිර්මාණය කර ගුවන්යානා වලට සවිකෙරෙනවා.. අමෙරිකාවේ National Transportation Safety Board [NTSB] ආයතනය මේ පරීක්ෂණ සහ නිගමන වාර්තා නිකුත්කරන සහ අධ්‍යයනය කරන ප්‍රමුඛතම ආයතනයයි…

මේ අයුරින් කෙරෙන දීර්ඝ සහ අඛණ්ඩ පරීක්ෂණ වල ප්‍රතිඵලයක් ලෙස අද වනවිට ගමන්කෙරන දුරට සාපේක්ෂව ගුවන් ගමන ලොව සුරක්ෂිතම ප්‍රවාහන මාධ්‍යයන්ගෙන් එකක් බවට පත්වී තිබෙනවා…

කෙසේ වෙතත් අනෙක් කවර අනතුරකට වඩා ගුවන් අනතුරකට ලැබෙන ප්‍රසිද්ධිය සහ අවධානය ඉතා වැඩියි… ඒ ප්‍රධාන වශයෙන්ම එක් ගුවන් අනතුරක් හා බැඳී තිබෙන ජීවිත ප්‍රමාණය වැඩි නිසා සහ ගුවන් ගමන් පිළිබඳ කාගේත් සිතේ ඇති චකිතය නිසා වියහැකියි.. කෙසේ වුවත් ගුවන් ගමනේ ඇති වේගය, විභව ශක්තිය ඇතුළුව යානාවක ඇති අධි ගම්‍යතාව නිසා බොහෝමයක් අනතුරු මාරාන්තික වීම වැළක්විය නොහැකියි.

කෙසේ නමුත් සෑම වසරකදීම සිදුවන මේ ගුවන් අනතුරු වලින් අහිමිවන්නේ වටිනා මිනිස් ජීවිතයි.. මේ ජීවිත සුරක්ෂිත කිරීමට මීටවඩා සැලකිලිමත් වියයුතුබව මගේ හැඟීමයි..

ප්‍රහාරක ගුවන්යානා නියමුවන්ට තියෙන්නාවගේ විසර්ජන පුටුවක් [ Ejection Seat] මගී ගුවන් යානාවලටත් හඳුන්වාදිය හැකි බව මගේ මතයයි.. මෙහිදී ගුරුත්වයට එරෙහිව යෑමට ක්ෂණිකව ඇතිකෙරෙන අධි පීඩනය සහ විසර්ජනය නිසා එක් එක පුටුවට මෙවන් පද්ධතියක් සවිකිරීමට පුටු දෙකක් අතර පවතින දුර වැඩිකිරීමට සිදුවීම පාඩුවක් විය හැකියි..

නමුත් මගේ අදහස නම් සියළුම මගීන සහිතව තට්ටුව කොටස් කිහිපයකින් හෝ විසර්ජනය කිරීමට ඇති හැකියාව අහක දැමිය යුතු නැති බවයි… මේ අයුරින් යානය කඩාවැටීමට ආසන්නතම අවස්ථාවකදී ගුවන් නියමුවන්ට මගීන් විසර්ජනය කිරීමට අවස්ථාව සැලසෙනු ඇති..

ප/ලි : ජීවිතය අනිත්‍යය… මා ඔහුගේ හොඳ නරක දන්නේ නැත.. කිසි දිනෙක මා ඔහු දැනගෙන සිටියේද නැත.. මා ඔහුගේ බ්ලොග් සටහන් කියැවූ තවත් එක් පුද්ගලයේක් පමණක් වීමි… එබැවින් ඔහුගේ ගුණගැයුමට මා දන්නේ නැත.. නමුත්, … ‘බ්ලොග් අවකාශයේ අප අතර සිටි හදිසියේ සමුගෙන ගිය කුමුදු පින්තෝ මහතාට නිවන් සුව ලැබේවා!’ යන්න කීමට පමණක් අවශ්‍යයව ඇත.

මුරලි, ඔබට ස්තූතියි !

මේ කුඩා සටහන ලියන්නේ අද දිනයේ ටෙස්ට් ක්‍රිකට් ක්‍රීඩාවෙන් සමුගත්, එදා මෙදාතුර ශ්‍රී ලංකාවෙන් බිහිවූ විශිෂ්ටතම ක්‍රිකට් ක්‍රීඩකයා වන මුත්තයියා මුදලිදරන් හට බහ තෝරන වියේ පටන් ක්‍රිකට් උන්මාදයේන් පෙළුන රසිකයෙක් වශයෙන් මගේ උපහාරය පුදකිරීමටයි…

ඔහු ලොව හොඳම දඟපන්දු යවන්නාද? එහෙමත් නැත්නම් ලොව හොඳම පන්දුයවන්නාද යන්නට තර්ක අවශ්‍යය නැත. මම කවදාවත් බ්‍රැඩ්මන් ක්‍රීඩා කරනු දැක නැති බැවින්, මා හට නම් මුරලිදරන් යනු ලොව බිහිවූ හොඳම ක්‍රිකට් ක්‍රීඩකයා යි.

කලක් දෙකඩ වී තිබූ ජාතියක, බෙහෙතකටවත් පෙන්නන්නට තිබූ එකමුතු බවේ එකම මිණිපහන වූයේ මුරලිදරන් නැමැති මේ සොඳුරු ක්‍රීඩකයායි…

ඔහු හා හා පුරා කියා ඇතුළුවුනේ එතෙක් ටෙස්ට් තරඟ 3ක් පමණක් දිනාතිබූ කන්ඩායමකටයි… එතැන් සිට ඇරඹි ඔහුගේ ක්‍රීඩාදිවිය අද අවසන්වන විට ඔහු සිටියේ වත්මන් ලොව අංක එකේ ටෙස්ට් කන්ඩායම ලැජ්ජාසහගත ලෙස පරාජය කල, වරක් ලෝක කුසලානයද දිනූ ශක්තිමත් කන්ඩායමකය.. මේ ශක්තිමත් ශ්‍රී ලංකා කන්ඩායමේ සෑම ජයග්‍රහණයකම පාහේ පිටුපසින් සිටි මුරලි, ඒ සුවිශේෂ දක්ෂතාව නිසාම ලොව කිසිවෙකුටත් සම කල හැකියි සිතිය නොහැකි කඩුලු 800ක් රැගෙන අද ලෝක පූජිත ලෙස සමුගෙන යන්නේ තවත් වසර දෙක තුනක් ක්‍රීඩාකල හැකිව තිබියදීය…

මුරලි සුපිරි ක්‍රීඩකයේක් පමණක් වූයේ නැත, ඔහුගේ සාර්ථකත්වයේන් දශමයක තරමක් වත් ඔහු හිතට ගත්තේද නැත. සැබවින්ම ඔහු නිහතමානි මිනිසෙක් විය.. ඒ ගැන වැඩි කතා කීමත අවැසි නැත. වසර ගනනාවක් Cricinfo අඩවියේ ශ්‍රී ලංකා සංස්කාරක වූ Charlie Austin තමන්ගේ “Cheeky, chatty, charitable” ලිපියෙන් මුරලිගේ ඒ සුන්දර මනුශ්‍යත්වය ගැන කදිමට විස්තර කර ඇත…

මුරලි වැනි කෙනෙක් නැවත ශ්‍රී ලංකාවට නොලැබෙනු ඇත. මෙතුවාක් කල් රට වෙනුවෙන් දැක්වූ ඒ දක්ෂතා සඳහා අපට කල හැකි එකම දෙය ඔහුට හදවතින්ම ස්තූති කිරීම පමණකි…මුරලි ඔබට ස්තූතියි !

අප ශ්‍රී ලාංකික සැවොම ඉත සිතින් ඔබේ දියුණුවද ඔබට දීර්ඝායුෂ ද පතන්නෙමු..

වඳුරෝ සහ ගස්ලබු යුෂ …

ඩෙංගු රෝගය ගැන හැම තැනම කතා වෙනවානේ දැන්. ලංකාවේ ප්‍රශ්නයක් ඇතිවෙලා ඒක උපරිමයටම යන්න ඕන ඒකට හරියන පිළියමක් යොදන්න. සුනාමිය ඇවිත් ඔක්කොම කාබාසිනියා කරලා දානකන් අනතුරු ඇඟවීමේ පද්ධතියක් තිබුනේ නෑ.. ඒකනම් කමක් නෑ කියමුකෝ, මොකද හදිසි ආපදාවක් නේ. ඒත් ඩෙංගු එහෙමද? ඒක වළක්වන්න කිසිදෙයක් කළ පාටක් නම් පේන්න නැහැ…

කොහොම හරි  ‘කට කහන කතා‘ ලියන අපේ ‘ දුමී ‘ නම් ඩෙංගු උවදුරෙන් මිදෙන්න යස පිළියමක් ගැන ලියල තිබුනා.. ඒ ලිපිය කියවන්න බැරි උන අය ඔතනින් ගිහින් කියවන්න… එදාම වගේ ලංකාවේ ප්‍රසිද්ධ වෙබ් අඩවි වලත් ඒ ගැන සටහන් කරලා තිබ්බා..

ඩෙංගු සුව කරන්න පුලුවන් මේ ගස්ලබු කොල යුෂ පානය ගැන වැඩිදෙනා දැනුවත් කරන්න කියලා අපේ බ්ලොග් ලියන සහෘදයෝ දුමී ගේ අර ලියමන කොපි කරලා තමන්ගේ බ්ලොග් එකෙ දාගෙන තිබුනා.. මොකද එක්කෙනෙක් හරි ඒක කියවලා හොඳ සුවය ලබනවානම් ඒකත් මසුරං වටින නිසා… මේ වගේ බ්ලොග් වලින් කරන්න පුලුවන් සමාජ සේවය විශාලයි…ඒ වගේම බ්ලොග් කියැවීමේන් ලැබෙන දැනුමත් විශාලයි… බ්ලොග් ලියන්න පටං අරං තාම වැඩි කාලයක් නැති වුනාට මම සෑහෙන කාලෙක ඉඳලා බ්ලොග් කියවලා හොඳ තෘප්තියක් ලැබුවා…

ඒක නෙවෙයි….කියන්න ආපු දේ නෙවෙයි ලියැවුනේ…

මම අද මේ පැත්තේ ආවේ මේ ඩෙංගු ගැන කතාවක් ලියන්න… වෙන දේවල් තමයි ලියැවුනේ…

මේක අද අපේ කන්තෝරුවේ වෙච්ච කතාවක්… අපේ කට්ටියත් ඉතින් දවල්ට කෑම ගන්න ගමන් ඩෙංගු සුව කරන්න පුලුවන් කියන මේ ගස්ලබු යුෂ ප්‍රතිකාරය ගැන කතාකර කර හිටියා..

කවුද ඇහුවා ‘ ඉතිං ගස්ලබු කොල යුෂ මාර තිත්ත ඇතිනේ කොහොමද බොන්නේ?’ කියලා.. ඒකට කට්ටිය තම තමන්ගේ අය්ඩියාස් දෙන අතර තුරේ තවත් කවුද කිව්වා ‘වඳුරෝ නම් ගස්ලබු කොල කනවා’ කියලා…

මමත් ඉතිං දන්නේ නැති නිසා ඇහුවා ඇත්තටම වඳුරෝ ගස්ලබු කොල කනවද කියලා..

මොකද ගස්ලබු කොල කන සතෙක් මම නම් තාම දැකලා නැති නිසා.

වඳුරෝ ගස්ලබු කොල කන නිසා වඳුරන්ට නම් ඩෙංගු හැදෙන්නේ නෑ කියල තමයි කට්ටියගේ තර්කය.

ඒත් එක්කම අපේ කසුන් මහත්තයා පැනලා කිව්වා ‘ ඒක තමයි…ඇත්ත වෙන්න ඇති… මම බෙහෙත් ගන්න ගියපු එක වෙලාවකවත් බෙහෙත් ගන්න ආපු වඳුරෙක් නම් දැකල නෑ…’ කියලා…

මේක අහපු ගමන් වැඩිය කතා බහ නොකරන අනුර අයියා පැනලා කියපි, ‘ ඇයි කසුන් මෙච්චර කල් බෙහෙත් ගන්න ගියේ සත්තුන්ට බෙහෙත් දෙන තැනකට ද..’ කියලා..

දීපංකො උත්තර…

ප/ලි: මමත් සූටි කාලේ තියෙන විසේට සබං බෝල පුම්බන්න ගිහින් ගේම දීල තියෙන්නේ රටක් වටිනා අවුසදේකට නේද? අපේ ගෙදරින් ඒ වැරැද්දට මට බරපතල ගුටි සහිතව සිර දඩුවමක් දුන්නේ මේක මේ තරං වටිනා අවුසදයක් කියල දැනං හිටපු නිසාද මන්දා….

ඇඳේ අබිරහස

උසස් පෙළට පිකිස් එහෙම නැත්නං භෞතික විජ්ජාව කරපු කට්ටිය දන්නවා ඇති මොකද්ද අනුනාදය කියන්නේ කියල.

අනුනාදය, සින්හලෙන් කියනවා නම් ‘Resonance’ කියන්නේ ඇතැම් සංඛ්‍යාත වලදී යම්කිසි රේඛීය පද්ධතියක් [ a linear system ] අධි විස්තාරයකින් කම්පණය වීමට දක්වන නැඹුරුවයි. එක එක සංඛ්‍යාත පධතියකට ලබා දෙද්දී ඇතිවෙන අනුනාදය එකිනෙකට වෙනස්… සෑම පද්ධතියකටම තියෙනවා ස්වාභාවික සංඛ්‍යාතයක් [ Natural Frequency ] කියල එකක්… මේ අනුනාදය උච්චතම වෙන්නේ අපි ලබාදෙන සංඛ්‍යාතය එම පද්ධතියේ ස්වාභාවික සංඛ්‍යාතයට සමාන වුන වෙලාවේදී… ඒ වෙලාවෙදී තමයි ඒ පද්ධතිය උපරිම විස්තාරයකින් කම්පණය වෙන්නේ…

ඔය සමහර වචන වලට එක එක ගෑණු ළමයි උපරිම විස්තාරයකින් කම්පණය වෙන්නේ එයාලගේ Natural Frequency එකට හරියන Frequency එකක් වැදුනම තමයි…  ගොඩක් පිරිමි අය කනේ පාර කන්නේ අන්න ඒ වගේ වෙලාවට තමයි ..

අපි ඔය හින්දි ෆිල්ම් වල දකිනවා වගේ, කෙල්ලට පොඩි අකරතැබ්බයක් උනාම වෙඩි 10 – 15 උනත් කාගෙන ඇවිල්ලා කෙල්ලව බේරගන්නේ කොල්ලගේ පද්ධතිය උපරිම විස්තාරයකින් කම්පණය වෙන්න පටන්ගත්තු නිසා තමයි.. තේරෙන බාසාවෙන් කිව්වොත් බොක්කට වැදුනම තමයි.. :පී

ඕකට අපේ පිකිස් පොත් වල නම් තිබ්බ උදාහරනය තමයි අර සොල්දාදුවෝ ටිකක් මාච් කරන්ගෙන එන කොට ඒ මාච් එකේ සංඛ්‍යාතය Angers Bridge එකෙ ස්වභාවික සංඛ්‍යාතයට සමාන වෙලා පාලම කඩාවැටීම…

ඔය ඇබිත්තං භෞතික විජ්ජා පාඩම කරන්න උනේ මේ කතා බාගයට පෙර වදනක් විදියට. කතාවට වඩා පෙරවදන ලොකු වීම ගැන සොරි වෙන්න ඕන, මොකද පිකිස් නොකරපු අයටත් පොඩ්ඩක් තේරෙන්න එපැයි සිද්දිය මොකද්ද කියල… කාට හරි ඔය පෙරවදනේ තියෙන කිසි දෙයක් මීටර් උනේ නැත්නම්, බය වෙන්ඩ දෙයක් නෑ, ඒත් කතාව තේරෙයි. (එහෙනම් මොන මගුලකටද කිව්වේ නේද )

කතාව මේකයි… මේක සත්‍ය සිද්දියක් !

මම දන්න කියන යාලුවෙක්ගේ ඇඳ අද්භූත විදියට හෙල්ලෙන්න පටන් අරං… රෑට ඇඳ හෙන හයියෙන් හෙල්ලෙනවාලු…පොරට කෙසේ වෙතත් බිරින්දෑට නම් නිදාගන්න නම් බැහැලු… ඒත් ඉතිං අපේ පොරට නම් කිසි ගානක් නෑලු.. යස අගේට නින්ද යනවලු… ඒ නිසා දැන් උන්නැහේගේ බිරින්දෑ වෙනම කාමරයක තමයි නිදාගන්නේ…

ඇඳ එහෙම උපරිම විස්තාරයකින් කම්පණය වෙන්නේ අනුනාද අවස්ථාවකදී… ඒ කියන්නේ ඇඳේ ස්වාභාවික සංඛ්‍යාතයට සමාන සංඛ්‍යාතයක් එයට ලැබීමෙන්..

මොකද්ද දන්නවද කේස් එක?

අපේ පොර හෙන හයියෙන් ගොරවනවා ලු… මේ ගෙරවිල්ලේ තරම කොච්චරද කියනව නම්, ඒක සංඛ්‍යාතය ඇඳේ සංඛ්‍යාතයට සම වෙලා ඇඳ නිකන් නිව්මෝනියා හැදිච්ච ලෙඩෙක් වගේ වෙව්ලනවාලු..

අනේ අර අසරණ කෙල්ල ඒ නිසා වෙන තැනක නිදාගන්නවා… අපේ එකා නම් සැපට ඇඳ උඩ.. මොකද ඌට නින්ද ගියේ නැත්නම් ඇඳ අනුනාද වෙන්නෙත් නෑනේ !

ප/ලි: උඩ අමුනලා තියෙන පින්තූරේ තියෙන Tacoma Narrows පාලමත් අනුනාදය නිසා කඩාවැටුනා කියල ප්‍රසිද්ධ වෙච්ච පාලමක්.. ඒ උනාට ඒකේ ඇත්ත හේතුව ගගනප්‍රත්‍යාස්ථ ආවරණයක් [ aeroelastic effect ] කියලා පස්සේ නිශ්චිත උනා.